A ÇIMMA Ti t'adesciæ 'nsce l'éndegu d'u matin ch'a lŷxe a l'ha 'n pê 'n tæra e l'âtru in mâ, ti t'amiæ ou spêgiu de'n tiänin e u çê [u] s'amiâ ou spêgiu d'a ruzaa, ti metiæ u brŷgu réddenu inte'n cantun che se daa cappa a zgyggia 'n cyxinn-a a strîa à xœa de cuntâ e pagge che ghe sun a çimma a l'é za pinn-a, [a] l'é za cyxîa. Çê seren, tæra scŷa, carne tennia nu fâte neigra nu turnâ dŷa. Bell'uëgê, strapunta de tyttu bun, primma de batezâla 'nt'u prebugiun cun duî agugiuin drîtu in punta de pê da súrvia 'n zy fîtu ti a punzigjæ. Âia de lynn-a vêgia, de ciæu de nêgia, che u ceegu u perde a testa, l'âze u sentê, oudû de mâ miscciòu de pèrsa lêgia, côs'âtru fâ, côs'âtru dâghe ou çê. Çê seren, tæra scŷa, carne ténnia nu fâte neigra nu turnâ dŷa, e 'nt'u numme de Marîa tytti diâi da sta pygnatta anæne vîa. Pôi vêgnan à pigiâtela i camê, te làscian tyttu u fymmu d'u tœ mestê, tucca ou fantin a primma cutelaa, mangiæ, mangiæ, nu sei chi ve mangjâ. Çe seren, tæra scŷa, carne ténnia nu fâte neigra nu turnâ dŷa e 'nt'u numme de Maria tytti diâi da sta pygnatta anæne vîa.